‹Maffian› av Kjell Höglund
Hem, miir händ ghöört das Sii dèè sind wo s groosskartell tuet kritisiere,
’s git wenig lüüt wo s waaged sich mit öis soo heftig z duelliere,
wo fliissig hèrt chönd shaffe, zudèm fèèig sind und ambiziöös.
So öpis gsemmir shportlich, jaa, mir sind au mängmaal generöös.
Um eerlich z sii, so hämmer Sii sho lènger under obserwanz,
es wachsaams aug uf Ine, ali tèètigkäite gnau shtudiert.
Beiidrukt hät öis impetus und analütishi brilianz.
I groosser häimlichkäit, fershtaat sich, hämmer fliissig shpioniert.
Si frööged sich natüürli nach em grund für öise hütig psuech:
Miir büüted Ine-n-aa bi öis e foortäilhafti mitgliidshaft.
Das eewig immer nume sälbshtloos tèètig sii ish doch en fluech.
Miir im groosskartell, mir bruuched iri frishi chraft. — !
Jaa, hee, beruiged Sii sich, redemer ooni foorggèès resultaat.
’s füert nienet hii wän Sii sich enerwiered, s grooskartell, das shtaat.
Mir findet die offèrte-n-elegant, mir mached daas mit fliiss.
Und maalemer nöd de tüüfel a d wand, es ish nöd ales shwarz und wiiss.
Es gilt öis läbe z laa, mir üebtid gegesiitig toleranz,
und wüürded bäidi profitiere, shlüstid miir en handel ab.
Wo soo entshlossehäit sich zämetuet mit sicherer prägnanz,
da zäichnet sich im pruefsaltaag en lukratiife wandel ab.
Und lüüt wie Sii, fo dèm kaliiber, wachsed würkli nöd uf böim.
Si gheied iri chance wägg und welked langsam for sich hii.
Si sind e jungi pflanze no, und miir realisiered tröim.
Miir im groosskartell — ziend us suure truube beshte wii.
Fersuechemer s poeetish, jaa, mir läsed, shezed au gedicht.
De mäntsh läbt nöd fo broot eläi, dur öis wiirt kunsht drum undershtüzt;
au d wüsseshaft, mir täiled, läbed daa em Darwin siini sicht.
D entwikligstheorii, die wiirt fo öis i praxis mit-benüzt.
Im kampf um tood und läbe, häisst, wèèr läbt und wèèr wiirt blau und grau,
entshäidet sich d natuur ganz sälbshtfershtändli immer für de besht.
Es überläbt mit regelmèèssikäit nu dèè wo shtarch und shlau.
Im groosse tshungel chunt de shwachi nienet hii mit siim protesht.
De letshti siiger nu fermeert sich und ferbräitet siini aart,
und soo macht d mäntshhäit fortshrit punkto chraft, fershlagehäit und lisht.
D natuurgsez wele grooss bekämpfe, daas ish weder gshiid no smaart.
Drum im groosskartell, da ish me nie en altruisht. — !
Si mäined das das gsez fo de natuur, das sig unmäntshlich hèrt,
de mäntsh sig dèè wo sich zu siinesgliiche solidaarish zäigt.
Und jedes indiwiduum zwaar andersh aber gliich fil wèrt.
Si sind idealishtishs opfer fo naiifer äifachhäit.
D geduld fom groosskartell, ja die ish grooss, doch langsam simmer muff.
Die shtuurhäit irersiits ish lächerlich und wiirt für sii no tüür.
Mir sind im shtand für oornig z soorge, au bim allergrööshte puff.
Das ish e warnig, nöd zum shpile, daa, hem, stömmer ii defüür.
Sii sind doch gopfershtuz inteligänt und tänked grooss und wiit.
Es bruucht doch zwüshed öis nu wäge nöd ganz suubere gshäft kä shtriit.
Es wèèr für bäidi siite s besht, mer hetid klaari deals im sak.
Miir im groosskartell gsend Sii als maa nach öisem gshmak. — !
Bewunderig ferdient bi ine, de shtrateegish sharfi blik.
Si sind zudèm i sache loogik übermèèssig kompetänt,
zum nöd fergässe Ires organisatoorishe talänt.
Mir eshtimiered, wie Si gsend, s politish üssersht grossi gshik.
En maa wie Sii, fernümftig, läit doch daa sich nie im läbe quèèr.
E zämenaarbet mit öis nüzti alne – wèèr für ali s besht.
Jez gänd si sich en ruk und mached s öis und ine nöd so shwèèr.
Miir bruuched Sii, Sii bruuched öis, die simpel taatsach, die shtaat fesht.
Si tänked jez, Si hindergiechtid iri gmäinshaft, wo Si shtüzt.
Das ish nöd soo, en phakt mit öis ish kän feraat, kä pèrfidii:
En guete chef macht kompromiss sobald s au nu de meerhäit nüzt.
Miir im groosskartell — findet daas ish shlicht demokratii.
Sii mäined no mir züchtid groossi, lösid chliini drum nöd gälte,
d dewiise seig, di chliine wägg, wil wichtig seiged groossi fäll.
Soo ish es nööd, bi öis da hät me möglichkäite wie nu sälte.
Ja, s groosskartell, das bringt öis woolshtand und daas elegant und shnäl.
Nu öisi gmäinshaft s besht fo alne mäntshe-n-usehole tuet.
Drum chömed Sii, fergüüded Sii nöd ziit, talänt und ire shwung,
ja, iri deshtruktiif kritik bedrängt bi öis d fertäidigung.
Drum ‹konshtuktiif› ish was mir wänd, und i der taat: Mir zaled guet.
Kritik fo inedraa, das ish e chance wo mir jedem gänd.
So chönd Sii öis als mitgliid pushe grad zu dèm wo Sii dän wänd.
Shtat d nase bluetig z shlaa: Die ussedraa, die haued miir i d pfane.
Miir im groosskartell — hebed nöd de ander bagge/di and’ri bagge-n-ane.
Esoo wie Sii tüend shtelig nèè, beiidrukt ali, finded miir.
Si gsend d probleem fo and’re lüüt, agiered überuus koräkt.
Wèr sälbshtloos handlet, unbeirt, i graader linie, ooni giir,
und kämpft dän no für hööchi ziil wie Sii, so öper gnüüst reshpäkt.
Jez finded Sii, die wo Si trääged – dène ginggt me nöd a s bäi:
Näi, falsh, was Sii händ gshaft, händ Sii doch anepraacht mit äigne händ.
Die rüksicht ish ferfèèlt, di ganz beloonig ish für Sii eläi,
wil plumpi korupzioon ish öpis wo mer sicher soo nöd wänd.
Sii sind so frei wie de wind und trozdèm punde wie-n-en gfroorne bach,
wil d meteoroloogii, die gilt als ganz determinishtishs fach.
Wän nöötig, shegg uusshtele zelt zu öisne besht behershte künsht.
Miir im groosskartell shtönd ii für Sii wän immer gwünsht. — !
’s cha sii das äine-n-ooni äigne shtandphunkt würkt kondizioniert.
Nu ish de shtèrchshti maa halt ooni dissipliin es blat im wind.
Ferfolged Si doch heeri ziil mit öis, durchuus ambizioniert,
shtat loosi bleter z haa, wo nach em eershte shturm fershwunde sind.
Jez gsend Si s äntli ii, wie miir für Sii kredänzed öisi hilf.
I Ine shtekt en groosse, aber nu wän under öisem huet.
Esoo wiirt nüüt fershwändet, nume-n-ooni öis, da shtaash im shilf.
Mit öis gemäinsam ish hingege nume s besht fom beshte guet.
Fergiss di groossi müe fom rewoltiere, di drooend offne-n-abgründ.
Und chum a d wèrmi, liebe fründ, a s laagerfüür bim groosse zält.
Da bish i beshter gselshaft, zäme-n-aneshtaa mit fründ für pfründ.
Miir im groosskartell ershaffed öis e shööni wält. — !
25.11.2022